Click on a word to bring up parses, dictionary entries, and frequency statistics
53. tum Valerius Horatiusque missi ad plebem condicionibus quibus videretur revocandam conponendasque res decemviris quoque ab ira et impetu multitudinis praecavere iubentur.
[2]
profecti gaudio ingenti
plebis in castra accipiuntur, quippe liberatores haud
dubie et motus initio et exitu rei.
[3]
ob haec iis advenientibus gratiae actae. Icilius pro multitudine verba
facit. idem, cum de condicionibus ageretur, quaerentibus legatis, quae postulata plebis essent, conposito
iam ante adventum legatorum consilio ea postulavit,
ut appareret in aequitate rerum plus quam in armis
reponi spei.
[4]
potestatem enim tribuniciam provocationemque repetebant, quae ante decemviros creatos auxilia plebis fuerant, et ne cui fraudi esset concisse milites aut plebem ad repetendam per secessionem libertatem.
[5]
de decemvirorum modo supplicio atrox postulatum fuit: dedi quippe eos aequum censebant vivosque
igni concrematuros minabantur.
legati ad ea: '
[6]
quae consilii fuerunt, adeo aequa
postulastis, ut ultro vobis deferenda fuerint; libertati
enim ea praesidia petitis, non licentiae ad inpugnandos alios.
[7]
irae vestrae magis ignoscendum quam indulgendum est, quippe qui crudelitatis odio in crudelitatem ruitis et prius paene, quam ipsi liberi sitis, dominari iam in adversarios vultis.
[8]
numquamne quiescet
civitas nostra a suppliciis aut patrum in plebem Romanam aut plebis in patres?
[9]
scuto vobis magis quam
gladio opus est. satis superque humilis est, qui iure
aequo in civitate vivit nec inferendo iniuriam nec patiendo.
[10]
etiam si quando metuendos vos praebituri estis,
cum reciperatis magistratibus legibusque vestris iudicia
penes vos erunt de capite nostro fortunisque, tunc ut
[p. 194]
quaeque causa erit statuetis; nunc libertatem repeti
satis est.'
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.