Click on a word to bring up parses, dictionary entries, and frequency statistics
30. in tempore legati a Marcello redierunt,
falsa eos suspicione incitatos memorantes nec causam
expetendae poenae eorum ullam Romanis esse.
[2]
erat e tribus Achradinae praefectis Hispanus,
Moericus nomine. ad eum inter comites legatorum
de industria unus ex Hispanorum auxiliaribus est
missus, qui sine arbitris Moericum nanctus primum
quo in statu reliquisset Hispaniam—et nuper inde
venerat—exponit: omnia Romanis ibi obtineri armis.
[3]
posse eum, si operae pretium faciat, principem
popularium esse, seu militare cum Romanis seu in
patriam reverti libeat; contra, si malle obsideri
[p. 456]
pergat, quam spem esse terra marique clauso?1
[4]
motus his Moericus, cum legatos ad Marcellum mitti
placuisset, fratrem inter eos mittit, qui per eundem
illum Hispanum secretus ab aliis ad Marcellum
deductus, cum fidem accepisset composuissetque
agendae ordinem rei, Achradinam redit.
[5]
tum
Moericus, ut ab suspicione proditionis averteret
omnium animos, negat sibi placere legatos commeare ultro citroque: neque recipiendum quemquam neque mittendum et, quo intentius custodiae
serventur, opportuna dividenda praefectis esse, ut
suae quisque partis tutandae reus sit. omnes
adsensi sunt.
[6]
partibus dividendis ipsi regio evenit
ab Arethusa fonte usque ad ostium magni portus;
id ut scirent Romani fecit.
[7]
itaque Marcellus nocte
navem onerariam cum armatis remulco quadriremis
trahi ad Achradinam2 iussit exponique milites regione portae quae prope fontem Arethusam est.
[8]
hoc cum quarta vigilia factum esset expositosque milites
porta, ut convenerat, recepisset Moericus, luce prima
Marcellus omnibus copiis moenia Achradinae adgreditur,
[9?]
ita ut non eos solum qui Achradinam tenebant
in se converteret, sed ab Naso etiam agmina armatorum concurrerent relictis stationibus suis ad vim
et impetum Romanorum arcendum.
[10]
in hoc tumultu
actuariae naves instructae iam ante circumvectaeque
ad Nasum armatos exponunt, qui inproviso adorti
[p. 458]
semiplenas stationes et adapertas fores portae, qua3 paulo ante excurrerant armati, haud magno certamine Nasum cepere desertam trepidatione et fuga custodum.
[11]
neque in ullis minus praesidii aut pertinaciae ad manendum quam in transfugis fuit,
quia ne suis quidem satis credentes e medio certamine effugerunt.
[12]
Marcellus, ut captam esse Nasum
comperit4 et Achradinae regionem unam teneri Moericumque cum praesidio suis adiunctum, receptui cecinit, ne regiae opes, quarum fama maior quam res erat, diriperentur.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.