Click on a word to bring up parses, dictionary entries, and frequency statistics
7. haec est nobilis ad Trasumennum pugna
[p. 222]
atque inter paucas memorata populi Romani clades.1
[2]
quindecim milia Romanorum in acie caesa; decem
milia sparsa fuga per omnem Etruriam diversis itineribus urbem petiere;
[3]
duo milia quingenti hostium
in acie, multi postea2 ex volneribus periere. multiplex caedes utrimque facta traditur ab aliis;
[4]
ego, praeterquam quod nihil auctum ex vano velim, quo nimis inclinant ferme scribentium animi, Fabium
aequalem temporibus huiusce belli potissimum auctorem habui.
[5]
Hannibal captivorum qui Latini nominis essent sine pretio dimissis, Romanis in vincula
datis, segregata ex hostium coacervatorum cumulis
corpora suorum cum sepeliri iussisset, Flamini quoque corpus funeris causa magna cum cura inquisitum
non invenit.
[6]
Romae ad primum nuntium cladis eius cum ingenti
terrore ac tumultu concursus in forum populi est factus.
[7]
matronae vagae per vias, quae repens clades adlata
quaeve fortuna exercitus esset, obvios percunctantur.
et cum frequentis contionis modo turba in comitium
et curiam versa magistratus vocaret,
[8?]
tandem haud
multo ante solis occasum M. Pomponius praetor
“pugna,” inquit “magna victi sumus.;”
[9]
et quamquam nihil certius ex eo auditum est, tamen alius ab
alio impleti rumoribus domos referunt consulem cum
[p. 224]
magna parte copiarum caesum, superesse paucos aut3 fuga passim per Etruriam sparsos aut captos ab
hoste.
[10]
quot casus exercitus victi fuerant, tot in curas
distracti4 animi eorum erant quorum propinqui sub C. Flaminio consule meruerant, ignorantium quae cuiusque suorum fortuna esset; nec quisquam satis
certum habet, quid aut speret aut timeat.
[11]
postero
ac deinceps aliquot diebus ad portas maior prope
mulierum quam virorum multitudo stetit aut suorum
aliquem aut nuntios de iis opperiens; circumfundebanturque obviis sciscitantes neque avelli, utique ab
notis, priusquam ordine omnia inquisissent, poterant.
[12]
inde varios voltus digredientium ab nuntiis cerneres,
ut cuique laeta aut tristia nuntiabantur, gratulantesque aut consolantes redeuntibus domos circumfusos.
feminarum praecipue et gaudia insignia erant et
luctus.
[13]
unam in ipsa porta sospiti filio repente
oblatam in complexu5 eius exspirasse ferunt; alteram, cui mors filii falso nuntiata erat, maestam sedentem domi ad primum conspectum redeuntis6 gaudio nimio exanimatam.
[14]
senatum praetores per dies aliquot ab orto usque ad occidentem solem in curia retinent, consultantes quonam duce aut quibus copiis resisti victoribus Poenis posset.
[p. 226]
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.