Click on a word to bring up parses, dictionary entries, and frequency statistics
52. iam ambo consules et quidquid Romanarum
virium erat Hannibali oppositum aut illis copiis defendi posse Romanum imperium aut spem nullam
aliam esse satis declarabat.
[2]
tamen consul alter,
equestri proelio uno et volnere suo aeger et minutus,1 trahi rem malebat: recentis animi alter eoque
ferocior nullam dilationem patiebatur.
[3]
quod inter Trebiam Padumque agri est Galli tum
incolebant, in duorum praepotentium populorum
certamine per ambiguum favorem haud dubie gratiam
victoris2 spectantes.
[4]
id Romani, modo ne quid moverent, aequo satis, Poenus periniquo animo
ferebat, ab Gallis accitum se venisse ad liberandos
eos dictitans.
[5]
ob eam iram, simul ut praeda militem
aleret, duo milia peditum et mille equites, Numidas
plerosque, mixtos quosdam et Gallos, populari omnem
deinceps agrum usque ad Padi ripas iussit.
[6]
egentes
ope Galli, cum ad id dubios servassent animos,
coacti ab auctoribus iniuriae ad vindices futuros
[p. 154]
declinant legatisque ad consules missis auxilium3 Romanorum terrae ob nimiam cultorum fidem in Romanos laboranti orant.
[7]
Cornelio nec causa nec
tempus agendae rei placebat, suspectaque ei gens
erat cum ob infida multa facinora tum, ut illa4 vetustate obsolevissent, ob recentem Boiorum perfidiam;
[8]
Sempronius contra continendis in fide sociis maximum vinculum esse primos qui eguissent5 ope defensos censebat.
[9]
Is tum collega cunctante6 equitatum suum mille peditum iaculatoribus ferme admixtis ad defendendum Gallicum agrum trans Trebiam mittit.
[10]
sparsos et incompositos, ad hoc graves praeda plerosque cum inopinato7 invasissent, ingentem terrorem caedemque ac fugam usque ad castra stationesque hostium fecere; unde multitudine effusa pulsi rursus subsidio suorum proelium restituere.
[11]
varia inde pugna sequentes inter cedentesque; cumque8 ad extremum aequassent certamen, maior tamen hostium numerus cecidisset, penes Romanos9 fama victoriae fuit.
1 aeger et minutus heerwagen: et minutus P1: eminutus
2 victoris edd.: uictor P.
3 A.U.C. 536
4 ut illa Weissenborn: utalia ς: ob iutilia P1: ob utilia P2.
5 primos qui eguissent Gronovius: primosque qui coissent P.
6 Is tum collega cunctante Luchs: tum collega cunctante ς:cum collegam cunctantem P.
7 inopinato Madvig: inopinatos P.
8 sequentes inter cedentesque; cumque Madvig: sequentes cumque P: sequentes cedentesque cum heusinger.
9 hostium numerus cecidisset, penes Romanos Rossbach: hostium Romanos P.
Livy. Boooks XXI-XXII With An English Translation. Cambridge. Cambridge, Mass., Harvard University Press; London, William Heinemann, Ltd. 1929: no copyright notice.
The Annenberg CPB/Project provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.