Click on a word to bring up parses, dictionary entries, and frequency statistics
17. nominatae iam antea consulibus provinciae
erant; tum sortiri iussi. Cornelio Hispania, Sempronio Africa cum Sicilia evenit.
[2]
sex in eum annum
decretae legiones et socium quantum ipsis videretur
et classis quanta parari posset.
[3]
quattuor et viginti
peditum Romanorum milia scripta et mille octingenti
equites, sociorum quadraginta milia peditum, quattuor
milia et quadringenti equites; naves ducentae viginti
quinqueremes, celoces viginti1 deducti.
[4]
latum inde
ad populum, vellent iuberent populo Carthaginiensi
bellum indici; eiusque belli causa supplicatio per
urbem habita atque adorati di ut bene ac feliciter
eveniret quod bellum populus Romanus iussisset.
[5]
inter consules ita copiae divisae: Sempronio datae
legiones duae—ea quaterna milia erant peditum et
treceni2 equites—et sociorum sedecim milia peditum, equites mille octingenti, naves longae centum sexaginta, celoces duodecim.
[6]
cum his terrestribus maritimisque copiis Ti. Sempronius3 missus in Siciliam, ita in Africam transmissurus si ad arcendum Italia Poenum consul alter satis esset.
[7]
Cornelio minus
copiarum datum, quia L. Manlius praetor et ipse
[p. 48]
cum haud invalido praesidio in Galliam mittebatur;4 navium maxime Cornelio numerus deminutus:
[8]
sexaginta quinqueremes datae5 —neque enim mari venturum aut ea parte belli dimicaturum hostem credebant—et duae Romanae legiones cum suo iusto equitatu et quattuordecim milibus sociorum peditum,
equitibus mille sescentis.
[9]
duas legiones Romanas et
decem milia6 sociorum peditum, mille equites socios, sescentos Romanos Gallia provincia eodem versa in Punicum bellum habuit.
1 ducentae viginti quinqueremes, celoces viginti edd.: ccxxv remes (riemes C) quinque celoces xx CM.
2 treceni crévier: ccc CM: trecenti ς.
3 Ti. Sempronius ς. t. sempronius CM.
4 A.U.C. 535
5 quinqueremes datae CM: quinqueremes datae celoces octo linsmayer.
6 decem milia Gronovius: cclcc C1M: CCL (with x??? δ 1111 above) C3.
Livy. Boooks XXI-XXII With An English Translation. Cambridge. Cambridge, Mass., Harvard University Press; London, William Heinemann, Ltd. 1929: no copyright notice.
The Annenberg CPB/Project provided support for entering this text.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.