Click on a word to bring up parses, dictionary entries, and frequency statistics
39. eo tempore in regia prodigium visu eventuque
mirabile fuit: puero dormienti, cui Servio Tullio fuit
nomen, caput arsisse ferunt multorum in conspectu.
[2]
plurimo igitur clamore inde ad tantae rei miraculum
[p. 46]
orto excitos reges, et cum quidam familiarium aquam
ad restinguendum ferret, ab regina retentum, sedatoque
eam tumultu moveri vetuisse puerum, donec sua sponte
experrectus esset.
[3]
mox cum somno et flammam abisse. tum abducto in secretum viro Tanaquil 'uiden
tu puerum hunc' inquit, 'quem tam humili cultu educamus? scire licet hunc lumen quondam rebus nostris
dubiis futurum praesidiumque regiae adflictae; proinde
materiam ingentis publice privatimque decoris omni
indulgentia nostra nutriamus'.
[4]
inde puerum liberum loco coeptum haberi erudirique artibus, quibus ingenia ad magnae fortunae
cultum excitantur. evenit facile, quod diis cordi esset:
iuvenis evasit vere indolis regiae, nec, cum quaereretur
gener Tarquinio, quisquam Romanae iuventutis ulla
arte conferri potuit, filiamque ei suam rex despondit.
[5]
hic quacumque de causa tantus illi honos habitus credere prohibet serva natum eum parvumque ipsum servisse. eorum magis sententiae sum, qui Corniculo
capto Servi Tulli, qui princeps in illa urbe fuerat,
gravidam viro occiso uxorem, cum inter reliquas captivas cognita esset, ob unicam nobilitatem ab regina
Romana prohibitam ferunt servitio partum Romae
edidisse in Prisci Tarquini domo;
[6]
inde tanto beneficio
et inter mulieres familiaritatem auctam, et puerum,
ut in domo a parvo eductum, in caritate atque honore
fuisse; fortunam matlis, quod capta patria in hostium
manus venerit, ut serva natus crederetur, fecisse.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.