Click on a word to bring up parses, dictionary entries, and frequency statistics
[27]
quapropter a natura mihi videtur potius quam indigentia orta amicitia, applicatione magis animi cum
quodam sensu amandi, quam cogitatione quantum
illa res utilitatis esset habitura. quod quidem quale
sit, etiam in bestiis quibusdam animadverti potest,
quae ex se natos ita amant ad quoddam tempus et
ab eis ita amantur, ut facile earum sensus appareat.
quod in homine multo est evidentius, primum ex ea
caritate quae est inter natos et parentis, quae dirimi
nisi detestabili scelere non potest, deinde cum similis
sensus exstitit amoris, si aliquem nacti sumus, cuius
cum moribus et natura congruamus, quod in eo
quasi lumen aliquod probitatis et virtutis perspicere
videamur.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.