Click on a word to bring up parses, dictionary entries, and frequency statistics
“
[86]
Etenim qui reliquas naturas omnes
earumque semina contineat, qui potest ipse non natura
administrari; ut, si qui dentes et pubertatem natura
dicat existere, ipsum autem hominem cui ea existant
non constare natura, non intellegat ea quae ecferant
aliquid ex sese perfectiores habere naturas quam ea
quae ex his efferantur. omnium autem rerum quae
natura administrantur seminator et sator et parens ut
ita dicam atque educator et altor est mundus omniaque
sicut membra et partes suas nutricatur et continet.
quod si mundi partes natura administrantur, necesse
est mundum ipsum natura administrari. Cuius quidem
administratio nihil habet in se quod reprehendi possit;
ex his enim naturis quae erant quod effici optimum
potuit effectum est.
”
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.