Click on a word to bring up parses, dictionary entries, and frequency statistics
“
[36]
is autem est gradus
in quo rerum omnium natura ponitur; quae quoniam
talis est ut et praesit omnibus et eam nulla res possit
inpedire, necesse est intellegentem esse mundum et
quidem etiam sapientem.
Quid autem est inscitius quam eam naturam quae
omnis res sit conplexa non optumam dici, aut, cum sit
optuma, non primum animantem esse, deinde rationis
et consilii compotem, postremo sapientem. qui enim
potest aliter esse optima? neque enim si stirpium similis sit aut etiam bestiarum, optuma putanda sit potius
quam deterruma. Nec vero, si rationis particeps sit nec
sit tamen a principio sapiens, non sit deterior mundi
potius quam humana condicio. homo enim sapiens fieri [p. 63]
potest, mundus autem, si in aeterno praeteriti temporis
spatio fuit insipiens, numquam profecto sapientiam
consequetur; ita erit homine deterior. quod quoniam
absurdum est, et sapiens a principio mundus et deus
habendus est.
”
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.