Click on a word to bring up parses, dictionary entries, and frequency statistics
[62]
Ac primo ab ipso Platone Aristoteles et Xenocrates, quorum
alter Peripateticorum, alter Academiae nomen obtinuit,
deinde ab Antisthene, qui patientiam et duritiam in Socratico
sermone maxime adamarat, Cynici primum, deinde
Stoici, tum ab Aristippo, quem illae magis voluptariae disputationes
delectarant, Cyrenaica philosophia manavit, quam
ille et eius posteri simpliciter defenderunt, hi, qui nunc
voluptate omnia metiuntur, dum verecundius id agunt, nec
dignitati satis faciunt, quam non aspernantur, nec voluptatem
tuentur, quam amplexari volunt. Fuerunt etiam alia
genera philosophorum, qui se omnes fere Socraticos esse
dicebant, Eretricorum, Erilliorum, Megaricorum, Pyrrhoneorum;
sed ea horum vi et disputationibus sunt iam diu
fracta et exstincta.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.