Click on a word to bring up parses, dictionary entries, and frequency statistics
[139]
Quid Critias?
quid Alcibiades? civitatibus quidem suis non boni, sed
certe docti atque eloquentes, nonne Socraticis erant disputationibus
eruditi? Quis Dionem Syracosium doctrinis
omnibus expolivit? Non Plato? Atque eum idem ille
non linguae solum, verum etiam animi ac virtutis magister
ad liberandam patriam impulit, instruxit, armavit. Aliisne
igitur artibus hunc Dionem instituit Plato, aliis Isocrates
clarissimum virum Timotheum Cononis praestantissimi
imperatoris filium, summum ipsum imperatorem hominemque
doctissimum? aut aliis Pythagorius ille Lysis
Thebanum Epaminondam, haud scio an summum virum
unum omnis Graeciae? aut Xenophon Agesilaum? aut
Philolaus Archytam Tarentinum? aut ipse Pythagoras totam
illam veterem Italiae Graeciam, quae quondam magna vocitata
est?
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.