Click on a word to bring up parses, dictionary entries, and frequency statistics
[5]
Vis enim,
ut mihi saepe dixisti, quoniam, quae pueris aut adulescentulis
nobis ex commentariolis nostris incohata ac rudia
exciderunt, vix sunt hac aetate digna et hoc usu, quem ex
causis, quas diximus, tot tantisque consecuti sumus, aliquid
eisdem de rebus politius a nobis perfectiusque proferri;
solesque non numquam hac de re a me in disputationibus
nostris dissentire, quod ego eruditissimorum hominum
artibus eloquentiam contineri statuam, tu autem illam ab
elegantia doctrinae segregandam putes et in quodam ingeni
atque exercitationis genere ponendam.
Ac mihi quidem saepe numero in summos homines ac
summis ingeniis praeditos intuenti quaerendum esse visum
est quid esset cur plures in omnibus rebus quam in dicendo
admirabiles exstitissent; nam quocumque te animo et cogitatione
converteris, permultos excellentis in quoque genere
videbis non mediocrium artium, sed prope maximarum.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.