This text is part of:
Search the Perseus Catalog for:
Click on a word to bring up parses, dictionary entries, and frequency statistics
DEMIPHO. NAUSISTRATA. CHREMES.
De.
Agedum, ut soles, Nausistrata, fac illa ut placetur nobis;
Ut sua voluntate id quod est faciendum faciat.
Na.
Faciam.
De.
Pariter nunc opera me adiuvas ac re dudum opitulata es.
Na.
Factum volo; at pol minus queo viri culpa quam me dignum est.
De.
5Quid autem?
Na.
Quia pol mei patris bene parta indiligenter
Tutatur; nam ex his praediis talenta argenti bina
Statim capiebat. Vir viro quid praestat!
De.
Binan quaeso?
Na.
Ac rebus vilioribus multo, tamen talenta bina.
De.
Hui.
Na.
Quid haec videntur?
De.
Scilicet.
Na.
Virmn me natum vellem:
10Ego ostenderem--
De.
Certo scio.
Na.
quo pacto--
De.
Parce, sodes,
Ut possis cum illa; ne te adolescens mulier defatiget.
Na.
Faciam ut iubes: sed meum virum abs te exire video.
Ch.
Hem, Demipho,
Iam illi datum est argentum?
De.
Curavi ilico.
Ch.
Nollem datum.
Hei, video uxorem, paene plus quam sat erat.
De.
Cur nolles, Chreme?
Ch.
15Iam recte.
De.
Quid tu? ecquid locutus cum ista es quamobrem hanc ducimus?
Ch.
Transegi.
De.
Quid ait tandem?
Ch.
Abduci non potest.
De.
Qui non potest?
Ch.
Quia uterque utrique est cordi.
De.
Quid istuc nostra?
Ch.
Magni: praeter haec,
Cognatam comperi esse nobis.
De.
Quid? deliras?
Ch.
Sic erit.
Non temere dico: redii mecum in memoriam.
De.
Satin sanus es?
Na.
20Au, obsecro, cave ne in cognatam pecces.
De.
Non est.
Ch.
Ne nega.
Patris nomen aliud dictum est: hoc tu errasti.
De.
Non norat patrem?
Ch.
Norat.
De.
Cur aliud dixit?
Ch.
Nunquamne hodie concedes mihi,
Neque intelliges?
De.
Si tu nihil narras--
Ch.
Pergis?
Na.
Miror quid hoc siet.
De.
Equidem hercle nescio.
Ch.
Vin scire? At ita me servet Iupiter
25Ut propior illi quam ego sum ac tu nemo est.
De.
Di vestram fidem!
Eamus ad ipsam: una omnes nos aut scire aut nescire hoc volo.
Ch.
Ah.
De.
Quid est?
Ch.
Itan parvam mihi fidem esse apud te?
De.
Vin me credere?
Vin satis quaesitum mihi istuc esse? Age, fiat: quid? illa filia
Amici nostri quid futurum est?
Ch.
Recte.
De.
Hanc igitur mittimus?
Ch.
30Quidni?
De.
Illa maneat?
Ch.
Sic.
De.
Ire igitur tibi licet, Nausistrata.
Na.
Sic pol commodius esse in omnes arbitror quam ut coeperas,
Mancre hanc; nam perliberalis visa est quum vidi mihi.
De.
Quid istuc negoti est?
Ch.
Iamne operuit ostium?
De.
Iam.
Ch.
O Iupiter,
Di nos respiciunt: gnatam inveni nuptam cum tuo tilio.
Deo.
Hem,
35Quo pacto id potuit?
Ch.
Non satis tutus est ad narrandum hic locus.
De.
At tu abi intro.
Ch.
Heus, ne filii quidem nostri hoc resciscant volo.
Publii Terentii Comoediae VI. P. Terentius Afer. Edward St. John Parry, M.A. London. Whitaker and Co., Ave Maria Lane; George Bell, Fleet Street. 1857.
NSF, NEH: Digital Libraries Initiative, Phase 2 provided support for entering this text.
This text was converted to electronic form by professional data entry and has been proofread to a high level of accuracy.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.