This text is part of:
Search the Perseus Catalog for:
Click on a word to bring up parses, dictionary entries, and frequency statistics
PHAEDRIA. ANTIPHO. GETA.
Ph.
Quid faciam? Unde ego nunc tam subito huic argentum inveniam miser,
Cui minus nihilo est? quod si hic potuisset nunc exorarier
Triduum hoc, promissum fuerat.
An.
Itane hunc patiemur, Geta,
Fieri miserum, qui me dudum, ut dixti, adiurit comiter,
5Quin, quum opus est, beneficium rursum ei experiamur reddere?
Ge.
Scio quidem hoc esse aequum.
An.
Age ergo, solus servare hunc potes.
Ge.
Quid faciam?
An.
Invenias argentum.
Ge.
Cupio; sed id unde edoce.
An.
Pater adest hic.
Ge.
Scio; sed quid tum?
An.
Ah, dictum sapienti sat est.
Ge.
Itane?
An.
Ita.
Ge.
Sane hercle pulchre suades: etiam tu hinc abis?
10Non triumpho ex nuptiis tuis si nihil nanciscor mali,
Ni etiam nunc me huius causa quaerere in maloiubeas crucem?
An.
Verum hic dicit.
Ph.
Quid? ego vobis, Geta, alienus sum?
Ge.
Haud puto.
Sed parumne est quod omnibus nunc nobis succenset senex,
Ni instigemus etiam ut nullus locus relinquatur preci?
Ph.
15Alius ab oculis meis illam in ignotum hinc abducet locum? Hem!
Tum igitur dum licet dumque adsum loquimini mecum, Antipho;
Contemplamini me.
An.
Quamobrem? aut quidnam facturus es cedo?
Ph.
Quoquo hinc asportabitur terrarum certum est persequi,
Aut perire.
Ge.
Di bene vertant, quod agas; pedetentim tamen.
An.
20Vide si quid opis potes afferre huic.
Ge.
Si quid? quid?
An.
Quaere, obsecro,
Ne quid plus minusve faxit quod nos post pigeat, Geta.
Ge.
Quaero. Salvus est, ut opinor; verum enim metuo malum.
An.
Noli metuere: una tecum bona mala tolerabimus.
Ge.
Quantum tibi opus est argenti? loquere.
Ph.
Solae triginta minae.
Ge.
25Triginta? hui percara est, Phaedria.
Ph.
Istaec vero vilis est.
Ge.
Age, age; inventas reddam.
Ph.
O lepidum!
Ge.
Aufer te hinc.
Ph.
Iam opus est.
Ge.
Iam feres.
Sed opus est mihi Phormionem ad hanc rem adiutorem dari.
An.
Praesto est: audacissime oneris quidvis impone, et feret.
Solus est homo amico amicus.
Ge.
Eamus ergo ad eum ocius.
An.
30Numquid est quod opera mea vobis opus sit?
Ge.
Nihil: verum abi domum;
Et illam miseram, quam ego nunc intus scio esse exanimatam metu,
Consolare: Cessas?
An.
Nihil est aeque quod faciam libens.
Ph.
Qua via istuc facies?
Ge.
Dicam in itinere: modo te hinc amove.
Publii Terentii Comoediae VI. P. Terentius Afer. Edward St. John Parry, M.A. London. Whitaker and Co., Ave Maria Lane; George Bell, Fleet Street. 1857.
NSF, NEH: Digital Libraries Initiative, Phase 2 provided support for entering this text.
This text was converted to electronic form by professional data entry and has been proofread to a high level of accuracy.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.