previous next

Click on a word to bring up parses, dictionary entries, and frequency statistics


PHORMIO. GETA.

Ph.

ITANE patris ais conspectum veritum hinc abisse?

Ge.
Admodum.

Ph.

Phanium relictam solam?

Ge.
Sic.

Ph.
Et iratum senem?

Ge.

Oppido.

Ph.
Ad te summa solum, Phormio, rerum redit.

Tute hoc intristi: tibi omne est exedendum. Accingere.

Ge.

5Obsecro te--

Ph.
Si rogabit?

Ge.
In te spes est--

Ph.
Eccere.

Quid si reddet?

Ge.
Tu impulisti--

Ph.
Sic opinor.

Ge.
Subveni.

Ph.

Cedo senem: iam instructa sunt mihi in corde consilia omnia.

Ge.

Quid ages?

Ph.
Quid vis nisi uti maneat Phanium, atque ex crimine hoc

Antiphonem eripiam, atque in me omnem iram derivem senis?

Ge.

O vir fortis, atque amicus. Verum hoc saepe, Phormio,

Vereor, ne istaec fortitudo in nervum erumpat denique.

Ph.
Ah,

Non ita est: factum est periclum: iam pedum visa est via.

Quot me censes homines iam deverberasse usque ad necem,

Hospites, tun cives? quo magis novi, tanto saepius.

15Cedodum, en unquam iniuriarum audisti mihi scriptam dicam?

Ge.

Qui istuc?

Ph.
Quia non rete accipitri tenditur neque miluo,

Qui male faciunt nobis: illis qui nihil faciunt tenditur.

Quia enim in illis fructus est; in illis opera luditur.

Aliis aliunde est periclum unde aliquid abradi potest:

Mihi sciunt nihil esse. Dices, "Ducent damnatum domum:"

Alere nolunt hominem edacem; et sapiunt, mea quidem sententia,

Pro maleficio si beneficium summum nolunt reddere.

Ge.

Non potest satis pro merito ab illo tibi referri gratia.

Ph.

Immo enim nemo satis pro merito gratiam regi refert.

25Tene asymbolum venire, unctum atque lautum e balneis,

Otiosum ab animo, quum ille et cura et sumtu absumitur

Dum tibi sit quod placeat; ille ringitur, tu rideas;

Prior bibas, prior decumbas; coena dubia apponitur.

Ge.

Quid istuc verbi est?

Ph.
Ubi tu dubites quid sumas potissimum.

Haec cum rationem ineas quam sint suavia et quam cara sint,

Ea qui praebet non tu hunc habeas plane praesentem Deum?

Ge.

Senex adest: vide quid agas: prima coitio est acerrima.

Si eam sustinueris, postilla iam, ut libet, ludas licet.

Creative Commons License
This work is licensed under a Creative Commons Attribution-ShareAlike 3.0 United States License.

An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.

load focus English (Henry Thomas Riley, 1874)
hide Places (automatically extracted)

View a map of the most frequently mentioned places in this document.

Download Pleiades ancient places geospacial dataset for this text.

hide References (3 total)
load Vocabulary Tool
hide Display Preferences
Greek Display:
Arabic Display:
View by Default:
Browse Bar: