This text is part of:
Search the Perseus Catalog for:
Click on a word to bring up parses, dictionary entries, and frequency statistics
MENEDEMUS. CHREMES.
Me.
Multo omnium nunc me fortunatissimum
Factum puto esse, gnate, quum te intelligo
Resipisse.
Ci.
Ut errat.
Me.
Te ipsum quaerebam, Chreme.
Serva, quod in te est, filium et me et familiam.
Ch.
5Cedo quid vis faciam?
Me.
Invenisti hodie filiam.
Ch.
Quid tum?
Me.
Hanc sibi uxorem dari vult Clinia.
Ch.
Quaeso quid tu hominis es?
Me.
Quid est?
Ch.
Iamne oblitus es
Inter nos quid sit dictum de fallacia,
Ut ea via abs te argentum auferretur?
Me.
Scio.
Ch.
10Ea res nunc agitur ipsa.
Me.
Quid dixti, Chreme?
Immo haec quidem, quae apud me est, Clitiphonis est
Amica.
Ch.
Ita aiunt: et tu credis omnia:
Et illum aiunt velle uxorem, ut, quum desponderim,
Des qui aurum ac vestem atque alia quae opus sunt comparet.
Me.
15Id est profecto: id amicae dabitur.
Ch.
Scilicet
Daturum.
Me.
Vah, frustra sum igitur gavisus miser.
Quidvis tamen iam malo quam hunc amittere.
Quid nunc renuntiem abs te responsum, Chreme,
Ne sentiat me sensisse, atque aegre ferat?
Ch.
20"Aegre?" nimium illi, Menedeme, indulges.
Me.
Sine.
Inceptum est: perfice hoc mihi perpetuo, Chreme.
Ch.
Die convenisse; egisse te de nuptiis.
Me.
Dicam: quid deinde?
Ch.
Me facturum esse omnia;
Generum placere: postremo etiam, si voles,
25Desponsam quoque esse dicito.
Me.
Hem, istuc volueram.
Ch.
Tanto ocius te ut poscat, et tu id quod cupis
Quam ocissime ut des.
Me.
Cupio.
Ch.
Nae tu propediem,
Ut istam rem video, istius obsaturabere.
Sed haec ut ut sunt, cautim et paulatim dabis,
30Si sapies.
Me.
Faciam.
Ch.
Abi intro; vide quid postulet.
Ego domi ero, si quid me voles.
Me.
Sane volo:
Nam te sciente faciam, quicquid egero.
Publii Terentii Comoediae VI. P. Terentius Afer. Edward St. John Parry, M.A. London. Whitaker and Co., Ave Maria Lane; George Bell, Fleet Street. 1857.
NSF, NEH: Digital Libraries Initiative, Phase 2 provided support for entering this text.
This text was converted to electronic form by professional data entry and has been proofread to a high level of accuracy.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.