This text is part of:
Search the Perseus Catalog for:
Click on a word to bring up parses, dictionary entries, and frequency statistics
SYRUS. CHREMES.
Sy.
Hac illac circumcursa: inveniendum est tamen
Argentum: intendenda in senem est fallacia.
Ch.
Num me fefellit hosce id struere? Videlicet
Quia Cliniae ille servus tardiusculus est,
5Idcirco huic nostro tradita est provincia.
Sy.
Quis hic loquitur? Perii. Numnam haec audivit?
Ch.
Syre.
Sy.
Hem.
Ch.
Quid tu istic?
Sy.
Recte equidem: sed te miror, Chreme,
Tam mane qui heri tantum biberis.
Ch.
Nihil nimis.
Sy.
"Nihil" narras? visa vero est, quod dici solet,
10Aquilae senectus.
Ch.
Heia.
Sy.
Mulier commoda et
Faceta haec meretrix.
Ch.
Sane, idem visa est mihi.
Sy.
Et quidem hercle forma luculenta.
Ch.
Sic satis.
Sy.
Ita non ut olim; sed uti nunc, sane bona:
Minimeque miror Clinia hanc si deperit.
15Sed habet patrem quendam avidum, miserum, atque aridum,
Vicinum hunc: nostine? At quasi is non divitiis
Abundet, gnatus eius profugit inopia.
Scis esse factum ut dico?
Ch.
Quid ego nesciam?
Hominem pistrino dignum.
Sy.
Quem?
Ch.
Istunc servulum
20Dico adolescentis.
Sy.
Syre, tibi timui male.
Ch.
Qui passus est id fieri.
Sy.
Quid faceret?
Ch.
Rogas?
Aliquid reperiret, fingeret fallacias,
Under esset adolescenti amicae quod daret;
Atque hunc difficilem invitum servaret senem.
Sy.
25Garris.
Ch.
Haec facta ab illo oportebat, Syre.
Sy.
Eho quaeso, laudas qui heros fallunt?
Ch.
In loco
Ego vero laudo.
Sy.
Recte sane.
Ch.
Quippe quia
Magnarum saepe id remedium aegritudinum est.
Huic iam mansisset unicus gnatus domi.
Sy.
30Iocone an serio illaec dicat, nescio;
Nisi mihi quidem addit animum, quo lubeat magis.
Ch.
Et nunc quid exspectat, Syre? an dum hinc denuo
Abeat, cum tolerare huius sumtus non queat?
Nonne ad senem aliquam fabricam fingit?
Sy.
Stolidus est.
Ch.
35At te adiutare oportet adolescentuli
Causa.
Sy.
Facile equidem facere possum, si iubes:
Etenim quo pacto id fieri soleat calleo.
Ch.
Tanto hercle melior.
Sy.
Non est mentiri meum.
Ch.
Fac ergo.
Sy.
At heus tu, facitodum eadem haec memineris,
40Si quid huius simile forte aliquando evenerit,
Ut sunt humana, tuus ut faciat filius.
Ch.
Non usus veniet, spero.
Sy.
Spero hercle ego quoque.
Neque eo nunc dico, quo quicquam illum senserim:
Sed si quid, ne quid. Quae sit eius ætas vides.
45Et nae ego te, si usus veniat, magnifice, Chreme,
Tractare possim.
Ch.
De istoc, quum usus venerit,
Videbimus quid opus sit: nunc istuc age.
Sy.
Nunquam commodius unquam herum audivi loqui,
Nec quum male facerem crederem mihi impunius
50Licere. Quisnam a nobis egreditur foras?
Publii Terentii Comoediae VI. P. Terentius Afer. Edward St. John Parry, M.A. London. Whitaker and Co., Ave Maria Lane; George Bell, Fleet Street. 1857.
NSF, NEH: Digital Libraries Initiative, Phase 2 provided support for entering this text.
This text was converted to electronic form by professional data entry and has been proofread to a high level of accuracy.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.