This text is part of:
Search the Perseus Catalog for:
View text chunked by:
Click on a word to bring up parses, dictionary entries, and frequency statistics
[89]
Alteram uero fabulam derogatione nostra plenam de Graecis
apposuit, de quo hoc dicere sat erit, quoniam qui de pietate
loqui praesumunt oportet eos non ignorare minus esse inmundum
per templa transire quam sacerdotibus scelesta uerba componere.
[90]
isti uero magis studuerunt defendere sacrilegum regem quam iusta
et ueracia de nostris et de templo conscribere; uolentes enim Antiocho
praestare et infidelitatem ac sacrilegium eius tegere, quo circa
gentem nostram est usus propter egestatem pecuniarum, detrahentes
nobis etiam quae in futuro essent dicenda mentiti sunt.
[91]
propheta
uero aliorum factus est Apion et dixit Antiochum in templo inuenisse
lectum et hominem in eo iacentem et propositam ei mensam
maritimis terrenisque et uolatilium dapibus plenam, et obstipuisset
his homo.
[92]
illum uero mox adorasse regis ingressum tamquam
maximum ei solacium praebiturum ac procidentem ad eius genua
extensa dextra poposcisse libertatem; et iubente rege, ut confideret
et diceret, quis esset uel cur ibidem habitaret uel quae esset causa
ciborum eius, tunc hominem cum gemitu et lacrimis lamentabiliter
suam narrasse necessitatem ait.
[93]
inquit esse quidem se Graecum,
et dum peragraret prouinciam propter uitae causam direptum se
subito ab alienigenis hominibus atque deductum ad templum et
inclusum illic, et a nullo conspici sed cuncta dapium praeparatione
saginari.
[94]
et primum quidem haec sibi inopinabilia beneficia prodidisse
et detulisse laetitiam deinde suspicionem postea stuporem,
ac postremum consulentem a ministris ad se accedentibus audisse
legem ineffabilem Iudaeorum, pro qua nutriebatur, et hoc illos facere
singulis annis quodam tempore constituto.
[95]
et compraehendere
quidem Graecum peregrinum eumque annali tempore saginare et
deductum ad quandam siluam occidere quidem eum hominem eiusque
corpus sacrificare secundum suas sollemnitates et gustare ex eius
uisceribus et iusiurandum facere in immolatione Graeci, ut inimicitias
contra Graecos haberent, et tunc in quandam foueam reliqua
hominis pereuntis abicere.
[96]
deinde refert eum dixisse paucos iam
dies debita sibimet superesse atque rogasse, ut erubescens Graecorum
deos et superantes in suo sanguine insidias Iudaeorum de
malis eum circumastantibus liberaret.
[97]
huiusmodi ergo fabula non
tantum omni tragoedia plenissima est, sed etiam impudentia crudeli
redundat, non tamen a sacrilegio priuat Antiochum, sicut arbitrati
sunt qui haec ad illius gratiam conscripserunt;
[98]
non enim praesumpsit
aliquid tale, ut ad templum accederet, sed sicut aiunt
inuenit non sperans. fuit ergo uoluntate iniquus impius et nihilominus
sine deo, quanta iussit mendacii superfluitas, quam ex ipsa re
cognoscere ualde facillimum est.
[99]
non enim circa solos Graecos
discordia legum esse dinoscitur, sed maxime aduersus Aegyptios
et plurimos alios. *quem enim horum non contigit aliquando
circa nos peregrinari, ut aduersus solos renouata coniuratione per
[100]
effusionem sanguinis egeremus? uel quomodo possibile est, ut ad
has hostias omnes Iudaei colligerentur et tantis milibus ad gustandum
uiscera illa sufficerent, sicut ait Apion?
[101]
uel cur inuentum hominem
quicumque fuit, non enim suo nomine conscripsit, *aut
quomodo eum in suam patriam rex non cum pompa deduxit, dum
posset hoc faciens ipse quidem putari pius et Graecorum amator
eximius, assumere uero contra Iudaeorum odium solacia magna
cunctorum?
[102]
sed haec relinquo; insensatos enim non uerbis sed
operibus decet arguere. sciunt igitur omnes qui uiderunt constructionem
templi nostri, qualis fuerit, et intransgressibilem eius purificationis
integritatem.
[103]
quattuor etenim habuit in circuitu porticus,
et harum singulae propriam secundum legem habuere custodiam;
in exteriorem itaque ingredi licebat omnibus etiam alienigenis;
mulieres tantummodo menstruatae transire prohibebantur.
[104]
in secunda
uero porticu cuncti Iudaei ingrediebantur eorumque coniuges,
cum essent ab omni pollutione mundae, in tertia masculi Iudaeorum
mundi existentes atque purificati, in quartam autem sacerdotes
stolis induti sacerdotalibus, in adytum uero soli principes sacerdotum
propria stola circumamicti.
[105]
tanta uero est circa omnia prouidentia
pietatis, ut secundum quasdam horas sacerdotes ingredi constitutum
sit; mane etenim aperto templo oportebat facientes traditas
hostias introire et meridie rursus, dum clauderetur templum.
[106]
denique
nec uas aliquod portari licet in templum, sed erant in eo solummodo
posita altare mensa turibulum candelabrum, quae omnia et
in lege conscripta sunt.
[107]
etenim nihil amplius neque mysteriorum
aliquorum ineffabilium agitur neque intus ulla epulatio ministratur;
haec enim quae praedicta sunt habent totius populi testimonium
manifestationemque gestorum.
[108]
licet enim sint tribus quattuor sacerdotum
et harum tribuum singulae habeant hominum plus quam
quinque milia, fit tamen obseruatio particulariter per dies certos,
et his transactis alii succedentes ad sacrificia ueniunt et congregati
in templum mediante die a praecedentibus claues templi et
ad numerum omnia uasa percipiunt, nulla re, quae ad cibum aut
potum adtineat, in templo delata.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.