Click on a word to bring up parses, dictionary entries, and frequency statistics
μετὰ δὲ
τούτους ἐλεφάντων ἅρματα ἀφείθη εἴκοσι τέτταρα καὶ
συνωρίδες τράγων ἑξήκοντα, κώλων δεκαδύο, ὀρύγων
ἑπτά, βουβάλων δεκαπέντε, στρουθῶν συνωρίδες ὀκτώ,
ὀνελάφων ἑπτά, καὶ συνωρίδες δ# ὄνων ἀγρίων, ἅρματα τέσσαρα. ἐπὶ δὲ πάντων τούτων ἀνεβεβήκει
παιδάρια χιτῶνας ἔχοντα ἡνιοχικοὺς καὶ πετάσους.
παρανεβεβήκει δὲ παιδισκάρια διεσκευασμένα πελταρίοις καὶ θυρσολόγχοις, κεκοσμημένα ἱματίοις καὶ
χρυσίοις. ἐστεφάνωτο δὲ τὰ μὲν ἡνιοχοῦντα παιδάρια
πίτυι, τὰ δὲ παιδισκάρια κισσῷ. ἐπῇσαν δὲ καὶ συνωρίδες καμήλων <ἕξ>, ἐξ ἑκατέρου μέρους τρεῖς: αἷς
ἐπηκολούθουν ἀπῆναι ὑφ᾽ ἡμιόνων ἀγόμεναι. αὗται
δ᾽ εἶχον σκηνὰς βαρβαρικάς, ἐφ᾽ ὧν ἐκάθηντο γυναῖκες
Ἰνδαὶ καὶ ἕτεραι κεκοσμημέναι ὡς αἰχμάλωτοι. κάμηλοι
δ᾽ αἳ μὲν ἔφερον λιβανωτοῦ μνᾶς τριακοσίας, σμύρνης
τριακοσίας, κρόκου καὶ κασίας καὶ κινναμώμου καὶ
ἴριδος καὶ τῶν λοιπῶν ἀρωμάτων διακοσίας. ἐχόμενοι
τούτων ἦσαν Αἰθίοπες δωροφόροι, ὧν οἳ μὲν ἔφερον
ὀδόντας ἑξακοσίους, ἕτεροι δὲ ἐβένου κορμοὺς δισχιλίους, ἄλλοι χρυσίου καὶ ἀργυρίου κρατῆρας ἑξήκοντα
καὶ ψήγματα χρυσοῦ. μεθ᾽ οὓς ἐπόμπευσαν κυνηγοὶ
β# ἔχοντες σιβύνας ἐπιχρύσους. ἤγοντο δὲ καὶ κύνες
δισχίλιοι τετρακόσιοι, οἳ μὲν Ἰνδοί, οἱ λοιποὶ δὲ Ὑρκανοὶ καὶ Μολοσσοὶ καὶ ἑτέρων γενῶν. ἑξῆς ἄνδρες
ἑκατὸν πεντήκοντα φέροντες δένδρα, ἐξ ὧν ἀνήρτητο
θηρία παντοδαπὰ καὶ ὄρνεα. εἶτ᾽ ἐφέροντο ἐν ἀγγείοις
ψιττακοὶ καὶ ταῲ καὶ μελεαγρίδες καὶ φασιανοὶ ὄρνιθες καὶ ἄλλοι Αἰθιοπικοί, πλήθει πολλοί.'
εἰπὼν δὲ καὶ ἄλλα πλεῖστα καὶ καταλέξας ζῴων
ἀγέλας ἐπιφέρει: ‘πρόβατα Αἰθιοπικὰ ἑκατὸν τριάκοντα,
Ἀράβια τριακόσια, Εὐβοικὰ εἴκοσι, καὶ ὁλόλευκοι βόες
Ἰνδικοὶ εἴκοσι ἕξ, Αἰθιοπικοὶ ὀκτώ, ἄρκτος λευκὴ
μεγάλη μία, παρδάλεις ιδ#, πάνθηροι ι#2#, λυγκία δ#,
ἄρκηλοι γ#, καμηλοπάρδαλις μία, ῥινόκερως Αἰθιοπικὸς α#.
Athenaeus. Deipnosophistae. Kaibel. In Aedibus B.G. Teubneri. Lipsiae. 1887.
The National Endowment for the Humanities provided support for entering this text.
This text was converted to electronic form by optical character recognition and has been proofread to a high level of accuracy.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.