Ἄλκηστις
ὦ παῖδες, αὐτοὶ δὴ τάδ᾽ εἰσηκούσατε
πατρὸς λέγοντος μὴ γαμεῖν ἄλλην ποτὲ
γυναῖκ᾽ ἐφ᾽ ὑμῖν μηδ᾽ ἀτιμάσειν ἐμέ.
Ἄδμητος
καὶ νῦν γέ φημι καὶ τελευτήσω τάδε.
Ἄλκηστις
375ἐπὶ τοῖσδε παῖδας χειρὸς ἐξ ἐμῆς δέχου.
Ἄδμητος
δέχομαι, φίλον γε δῶρον ἐκ φίλης χερός.
Ἄλκηστις
σύ νυν γενοῦ τοῖσδ᾽ ἀντ᾽ ἐμοῦ μήτηρ τέκνοις.
Ἄδμητος
πολλή μ᾽ ἀνάγκη, σοῦ γ᾽ ἀπεστερημένοις.
Ἄλκηστις
ὦ τέκν᾽, ὅτε ζῆν χρῆν μ᾽, ἀπέρχομαι κάτω.
Ἄδμητος
380οἴμοι, τί δράσω δῆτα σοῦ μονούμενος;
Ἄλκηστις
χρόνος μαλάξει σ᾽: οὐδέν ἐσθ᾽ ὁ κατθανών.
Ἄδμητος
ἄγου με σὺν σοί, πρὸς θεῶν, ἄγου κάτω.
Ἄλκηστις
ἀρκοῦμεν ἡμεῖς οἱ προθνῄσκοντες σέθεν.
Ἄδμητος
ὦ δαῖμον, οἵας συζύγου μ᾽ ἀποστερεῖς.
Ἄλκηστις
385καὶ μὴν σκοτεινὸν ὄμμα μου βαρύνεται.
Ἄδμητος
ἀπωλόμην ἄρ᾽, εἴ με δὴ λείψεις, γύναι.
Ἄλκηστις
ὡς οὐκέτ᾽ οὖσαν οὐδὲν ἂν λέγοις ἐμέ.
Ἄδμητος
ὄρθου πρόσωπον, μὴ λίπῃς παῖδας σέθεν.
Ἄλκηστις
οὐ δῆθ᾽ ἑκοῦσά γ᾽: ἀλλὰ χαίρετ᾽, ὦ τέκνα.
Ἄδμητος
390βλέψον πρὸς αὐτούς, βλέψον.
Ἄλκηστις
οὐδέν εἰμ᾽ ἔτι.
Ἄδμητος
τί δρᾷς; προλείπεις;
Ἄλκηστις
χαῖρ᾽.
Ἄδμητος
ἀπωλόμην τάλας.
Χορός
βέβηκεν, οὐκέτ᾽ ἔστιν Ἀδμήτου γυνή.
This text is part of:
Search the Perseus Catalog for:
Table of Contents:
Click on a word to bring up parses, dictionary entries, and frequency statistics
Euripides. Euripides, with an English translation by David Kovacs. Cambridge. Harvard University Press. forthcoming.
The Annenberg CPB/Project provided support for entering this text.
Purchase a copy of this text (not necessarily the same edition) from Amazon.com