This text is part of:
Search the Perseus Catalog for:
Table of Contents:
Click on a word to bring up parses, dictionary entries, and frequency statistics
Ὀδυσσεύς
Κύκλωψ, ἄκουσον: ὡς ἐγὼ τοῦ Βακχίου
520τούτου τρίβων εἴμ᾽, ὃν πιεῖν ἔδωκά σοι.
Κύκλωψ
ὁ Βάκχιος δὲ τίς; θεὸς νομίζεται;
Ὀδυσσεύς
μέγιστος ἀνθρώποισιν ἐς τέρψιν βίου.
Κύκλωψ
ἐρυγγάνω γοῦν αὐτὸν ἡδέως ἐγώ.
Ὀδυσσεύς
τοιόσδ᾽ ὁ δαίμων: οὐδένα βλάπτει βροτῶν.
Κύκλωψ
525θεὸς δ᾽ ἐν ἀσκῷ πῶς γέγηθ᾽ οἴκους ἔχων;
Ὀδυσσεύς
ὅπου τιθῇ τις, ἐνθάδ᾽ ἐστὶν εὐπετής.
Κύκλωψ
οὐ τοὺς θεοὺς χρῆν σῶμ᾽ ἔχειν ἐν δέρμασιν.
Ὀδυσσεύς
τί δ᾽, εἴ σε τέρπει γ᾽; ἢ τὸ δέρμα σοι πικρόν;
Κύκλωψ
μισῶ τὸν ἀσκόν: τὸ δὲ ποτὸν φιλῶ τόδε.
Ὀδυσσεύς
530μένων νυν αὐτοῦ πῖνε κεὐθύμει, Κύκλωψ.
Κύκλωψ
οὐ χρή μ᾽ ἀδελφοῖς τοῦδε προσδοῦναι ποτοῦ;
Ὀδυσσεύς
ἔχων γὰρ αὐτὸς τιμιώτερος φανῇ.
Κύκλωψ
διδοὺς δὲ τοῖς φίλοισι χρησιμώτερος.
Ὀδυσσεύς
πυγμὰς ὁ κῶμος λοίδορόν τ᾽ ἔριν φιλεῖ.
Κύκλωψ
535μεθύω μέν, ἔμπας δ᾽ οὔτις ἂν ψαύσειέ μου.
Ὀδυσσεύς
ὦ τᾶν, πεπωκότ᾽ ἐν δόμοισι χρὴ μένειν.
Κύκλωψ
ἠλίθιος ὅστις μὴ πιὼν κῶμον φιλεῖ.
Ὀδυσσεύς
ὃς δ᾽ ἂν μεθυσθείς γ᾽ ἐν δόμοις μείνῃ σοφός.
Κύκλωψ
τί δρῶμεν, ὦ Σιληνέ; σοὶ μένειν δοκεῖ;
Σιληνός
540δοκεῖ: τί γὰρ δεῖ συμποτῶν ἄλλων, Κύκλωψ;
Ὀδυσσεύς
καὶ μὴν λαχνῶδές γ᾽ οὖδας ἀνθηρᾶς χλόης.
Σιληνός
καὶ πρός γε θάλπος ἡλίου πίνειν καλόν.
κλίθητί νύν μοι πλευρὰ θεὶς ἐπὶ χθονός.
Κύκλωψ
ἰδού.
545τί δῆτα τὸν κρατῆρ᾽ ὄπισθ᾽ ἐμοῦ τίθης;
Σιληνός
ὡς μὴ παριών τις καταβάλῃ.
Κύκλωψ
πίνειν μὲν οὖν
κλέπτων σὺ βούλῃ: κάτθες αὐτὸν ἐς μέσον.
σὺ δ᾽, ὦ ξέν᾽, εἰπὲ τοὔνομ᾽ ὅ τι σε χρὴ καλεῖν.
Ὀδυσσεύς
Οὖτιν: χάριν δὲ τίνα λαβών σ᾽ ἐπαινέσω;
Κύκλωψ
550πάντων σ᾽ ἑταίρων ὕστερον θοινάσομαι.
Σιληνός
καλόν γε τὸ γέρας τῷ ξένῳ δίδως, Κύκλωψ.
Κύκλωψ
οὗτος, τί δρᾷς; τὸν οἶνον ἐκπίνεις λάθρᾳ;
Σιληνός
οὔκ, ἀλλ᾽ ἔμ᾽ οὗτος ἔκυσεν ὅτι καλὸν βλέπω.
Κύκλωψ
κλαύσῃ, φιλῶν τὸν οἶνον οὐ φιλοῦντα σέ.
Σιληνός
555οὐ μὰ Δί᾽, ἐπεί μού φησ᾽ ἐρᾶν ὄντος καλοῦ.
Κύκλωψ
ἔγχει, πλέων δὲ τὸν σκύφον δίδου μόνον.
Σιληνός
πῶς οὖν κέκραται; φέρε διασκεψώμεθα.
Κύκλωψ
ἀπολεῖς: δὸς οὕτως.
Σιληνός
οὐ μὰ Δί᾽, οὐ πρὶν ἄν γέ σε
στέφανον ἴδω λαβόντα γεύσωμαί τέ τι.
Κύκλωψ
560οἱνοχόος ἄδικος.
Σιληνός
<ναὶ> μὰ Δί᾽, ἀλλ᾽ οἷνος γλυκύς.
ἀπομακτέον δέ σοὐστὶν ὡς λήψῃ πιεῖν.
Κύκλωψ
ἰδού, καθαρὸν τὸ χεῖλος αἱ τρίχες τέ μου.
Σιληνός
θές νυν τὸν ἀγκῶν᾽ εὐρύθμως κᾆτ᾽ ἔκπιε,
ὥσπερ μ᾽ ὁρᾷς πίνονταῲχὤσπερ οὐκέτι.
Κύκλωψ
565ἆ ἆ, τί δράσεις;
Σιληνός
ἡδέως ἠμύστισα.
Euripides. Euripides, with an English translation by David Kovacs. Cambridge. Harvard University Press. forthcoming.
The Annenberg CPB/Project provided support for entering this text.
Purchase a copy of this text (not necessarily the same edition) from Amazon.com